SuperDizionari

monolengâl

lâ jù loc.v.

Vê un moviment o direzion dal alt al bas o di Nord a Sud o sim.

sinonims

calâ, sbassâsi, dâ jù, dismontâ, vignî jù

esemplis

"il sipari al va jù e la comedie e je finide"

gjavât fûr di "Co l'amôr al cimie" di Costantino Smaniotto

"la strade e va jù a plomp cuintri Colorêt e cuasi no si viodile tal mieç dai cocolârs"

gjavât fûr di "Il Crist di Quilin" di Riedo Pup

"il Valon par lâ a Triest e la Magnissa par lâ jù ta Bassis, jarin tra li stradis li plui pericolosis"

gjavât fûr di "Il luminut da la Madona" di Ranieri Mario Cossâr

lâ jù loc.v.

Dal mangjâ e dal bevi, jessi glotût

esemplis

"i esibirin un licôr dolçut. Lui al jere golôs piês de canaie e il dolç i leve jù come sîr"

gjavât fûr di "Pre Pitin" di Antoni Beline

"il mangjâ al va jù a grops par sante scugne e no par il plasê di gustâ o di cenâ in compagnie"

gjavât fûr di "Aiar di cjase" di Franca Mainardis

lâ jù loc.v.

Vê une riduzion di cuantitât, intensitât, valôr e v.i.

sinonims

calâ, sbassâsi, cangjâ

esemplis

"il câl paurôs de popolazion furlane che insom dal 1500 e jere lade jù di plui di un tierç rispiet ai prins agns dal secul"

gjavât fûr di "Storie dal popul furlan" di Gian Carlo Menis

"la fiere e jere lade jù scuasi dal dut"

gjavât fûr di "Il dolfin" di Carlo Sgorlon

lâ jù loc.v.

Di magle, colôr e v.i., smamîsi o sparî

esemplis

""Ten ca, ten ca la gjachete, tu âs di parâmi jù une magle di ont..." "Une magle di ont?! Nol sa che il gras nol va jù sence benzine?""

gjavât fûr di "Comari 'Sese" di Bruno Paolo Pellarini

detulis

"cuant che si va jù par la aghe, si cjapisi pai baraçs se no si po altri"

"la cjase dai contents e je lade jù par la aghe"

"tropis voltis l'amôr al va jù pai lavris"

torne sù